Coca-Cola-ն և PepsiCo-ն կդադարեցնեն խմիչքների վաճառքը Ռուսաստանում

Ամերիկյան զովացուցիչ ըմպելիքներ արտադրող The Coca-Cola Company ընկերությունը դադարեցրել է իր գործունեությունը Ռուսաստանում։ Այս մասին ասվում է ընկերության կայքում հրապարակված հաղորդագրության մեջ. հայտնում է ՏԱՍՍ-ը։

Coca-Cola ընկերությունն այսօր հայտարարել է, որ դադարեցնում է բիզնես գործունեությունը Ռուսաստանում։ Ընկերությունն ընդգծել է, որ իրենք շարունակելու են հետևել Ուկրաինայի շուրջ իրավիճակի զարգացմանը։

PepsiCo-ն նույնպես դադարեցնում է Ռուսաստանում խմիչքների վաճառքը, ինչպես նաև գովազդային գործունեությունը, սակայն մանկական սննդի վաճառքը կշարունակվի։ Այս մասին ասվում է ընկերության գործադիր տնօրեն Ռամոն Լագուարտայի՝ երեքշաբթի տարածած հայտարարության մեջ։ PepsiCo-ն այս որոշումը բացատրում է Ուկրաինայի իրադարձություններով։

«Մենք հայտարարում ենք Pepsi-Cola-ի և մեր խմիչքների, այդ թվում՝ 7Up-ի և Mirinda-ի վաճառքը Ռուսաստանում դադարեցնելու մասին: Մենք նաև դադարեցնում ենք ներդրումները և բոլոր գովազդային գործունեությունը Ռուսաստանում։ Մեր պարտականությունն է շարունակել առաջարկել մեր մյուս ապրանքները Ռուսաստանում, ներառյալ՝ առաջին անհրաժեշտության ապրանքները, ինչպիսիք են կաթը և մանկական սնունդը»,- ասվում է ընկերության հաղորդագրության մեջ: