Չորս միլիոն են պահանջում Coca-Cola-ից

Ուղղափառ ակտիվիստները Coca-Cola-ից պահանջում են չորս միլիոն ռուբլի փոխհատուցում`հասցված բարոյական վնասի դիմաց:

Ինչպես փոխանցում է Gazeta.ru-ն, ուղղափառներին զայրացրել են ընկերության գովազդային պաստառները, որոնցում ռուսական տաճարներ են պատկերված, իսկ մի քանի լուսանկարում տաճարների խաչերը գլխիվայր են:  Դրանք տարածվել են դեռեւս 2007 թվականին:

Այս հայցով դատարան է դիմել է հինգ հոգի` Նիժնի Նովգորոդից: Նրանք դեռեւս 2007-ին պահանջել էին Coca-Cola–ի դեմ քրեական գործ հարուցել՝ կրոնական թշնամանք հրահրելու եւ ազգային արժանապատվությունը ոտնահարելու համար, սակայն դատախազության քննչական կոմիտեն հրաժարվել էր դա անել:

2008 թվականին Ռուսաստանի Հակամենաշնորհային ծառայության առաջարկով գովազդը հանվել է, սակայն դա չի գոհացրել ակտիվիստներին: Նրանք ընկերությունից պահանջել են հրապարակավ ներողություն խնդրել եւ, որպես բարոյական վնասի փոխհատուցում, երկու միլիոն ռուբլի տալ քաղաքի քահանաներից մեկի կարիքավոր ընտանիքին:

Արձագանք չստանալով` նրանք դիմել են դատարան եւ այժմ պահանջում են չորս միլիոն ռուբլի: