Փերինչեքի «Հայրենիք» կուսակցությունը կոչ է անում Անկարային՝ դուրս գալ ՆԱՏՕ-ից

Թուրքիայի «Հայրենիք» (Vatan) կուսակցության նախագահ Դողու Փերինչեքը հինգշաբթի հանդես է եկել ՆԱՏՕ-ից Անկարայի դուրս գալու օգտին, քանի որ դա անհրաժեշտ է Թուրքիայի ազգային անվտանգության ամրապնդման համար։

«ՆԱՏՕ-ից դուրս գալն ամենաարդյունավետ պրակտիկան է ԱՄՆ-ի սպառնալիքների և դավադրությունների դեմ: Ազատվելով ՆԱՏՕ-ից՝ Թուրքիան կուժեղանա տնտեսության մեջ անկախության համար մղվող պատերազմում»,- ասել է Փերինչեքը ՏԱՍՍ-ին տված հարցազրույցում Թուրքիայի` Հյուսիսատլանտյան դաշինք մուտքի 70-ամյակի նախօրեին։

Նրա խոսքով՝ «ՆԱՏՕ-ին անդամակցության դադարեցումը ոչ միայն անհրաժեշտ է Թուրքիայի ազգային անվտանգության համար, այն նաև վստահություն կհաղորդի այն երկրներին, որոնք կանգնած են ԱՄՆ-ի սպառնալիքի առջև»։ «Թուրքիայի նման քայլը կարագացնի ՆԱՏՕ-ի կազմաքանդման գործընթացը, ինչը կնպաստի խաղաղության հաստատմանը ողջ աշխարհում»,- կարծում է քաղաքական գործիչը։

«Վաթան» կուսակցությունը, որը խորհրդարանում չէ, ակտիվորեն հանդես է գալիս Արևմուտքի, առաջին հերթին՝ ԱՄՆ-ի հետ դաշնակցային հարաբերություններ զարգացնելուց հրաժարվելու օգտին` որդեգրելով ռուսամետ կողմնորոշում: 

Հիշեցնենք նաև, որ Փերինչեքը աչքի է ընկնում նաև հուժկու հակահայկական քաղաքականությամբ:

Թուրքիան ՆԱՏՕ-ին անդամակցել է 1952 թվականի փետրվարի 18-ին`  դաշինքի ստեղծումից երեք տարի անց։