Թուրքական լրատվամիջոցները կրկին ռուսական հանրապետություններն ընդգրկել են «թյուրքական աշխարհում»

Թուրքական Karar թերթը ռուսական 10 շրջան անվանել է «թյուրքական հանրապետություններ», այդ թվում՝ Թաթարստանը, Բաշկիրիան, Չուվաշիան, Յակուտիան, Ալթայի երկրամասը, Դաղստանը և այլն։

Բացի դրանից՝ ևս մեկ ազգայնական պարբերական` Yeniçağ-ը, հրապարակել է նաև «կիսաանկախ թյուրքական պետությունների» մասին նյութեր։ Դրանք ներառում են նաև Խակասիայի և Տուվայի, Կարաչաևո-Չերքեզիայի և Կաբարդինո-Բալկարիայի հանրապետությունները։

Սա առաջին նման դեպքը չէ։ Ավելի վաղ Թուրքիայի «Ազգայնական շարժում» կուսակցությունը (MHP) Twitter-ում հրապարակել էր «Թյուրքական աշխարհի» քարտեզի լուսանկարը, որը բռնել էին Թուրքիայի նախագահ Ռեջեփ Թայիփ Էրդողանը և MHP-ի առաջնորդ Դևլեթ Բահչելին։ Ըստ քարտեզի՝ թյուրքական ազդեցության գոտում են Թաթարստանը, Բաշկիրիան, Ռուսաստանի հարավը,  Արևելյան Սիբիրի մի մասը, Իրանի հարավը, ինչպես նաև Ադրբեջանը, Ղազախստանը և այլ թյուրքական պետություններ։