ԵՄ-ն ժխտում է հունական կղզիների ինքնիշխանության վերաբերյալ որևէ կասկած` դատապարտելով Թուրքիայի հայտարարությունները

Եվրամիությունը կիրակի հայտարարել է, որ Հունաստանի ինքնիշխանությունը Արևելյան Էգեյան ծովի սեփական կղզիների նկատմամբ քննարկման ենթակա չէ:

Արտաքին գործերի գլխավոր խոսնակ Փիթեր Սպանոն հայտարարություն է տարածել Թուրքիայի արտգործնախարար Մևլութ Չավուշօղլուի վերջին մեկնաբանություններից հետո, երբ վերջինս կոչ է արել ապառազմականացնել կղզիները։

«Թուրքիայի արտաքին գործերի նախարար Մևլութ Չավուշօղլուի մեկնաբանությունները վերջերս տված հարցազրույցում, որոնք վիճարկում են Հունաստանի ինքնիշխանությունը նրա որոշ կղզիների նկատմամբ, արդյունավետ չեն և հակասում են Արևելյան Միջերկրական ծովում ապաէսկալացման ջանքերին, որոնք սահմանված են Եվրոպական խորհրդի 2021 թվականի մարտի 23-ի և հունիսի 24-25-ի եզրակացություններում»,- ասել է Սպանոն:

«Այս կղզիների նկատմամբ Հունաստանի Հանրապետության ինքնիշխանությունն անվիճելի է։ Թուրքիան պետք է հարգի դա, ձեռնպահ մնա այս կապակցությամբ սադրիչ հայտարարություններից և գործողություններից, անվերապահորեն հավատարիմ մնա բարիդրացիական հարաբերություններին և աշխատի ցանկացած վեճի խաղաղ կարգավորման ուղղությամբ։ Պետք է հարգել միջազգային պայմանագրերը»,- եզրափակել է նա։

Հիշեցնենք, որ Թուրքիայի արտգործնախարար Մևլութ Չավուշօղլուն հինգշաբթի կրկնել է հունական կղզիները ապառազմականացնելու կոչը՝ զգուշացնելով, որ եթե Աթենքը չփոխի իր դիրքորոշումը, կսկսվի բանավեճ, որը կասկածի տակ է դնում նրա ինքնիշխանությունը։