ԵՄ-ն խստորեն դատապարտել է Թուրքիայի նախագահի անընդունելի հայտարարությունները Վարոշա քաղաքի վերաբերյալ, Թուրքիայի ԱԳՆ–ն արձագանքել է

Եվրամիությունը դատապարտում է Կիպրոսի Վարոշա քաղաքում Թուրքիայի գործողությունները և Թուրքիայի նախագահ Ռեջեփ Թայիփ Էրդողանի ու Կիպրոսի թուրք առաջնորդ Էրսին Թաթարի համապատասխան հայտարարությունները: Այս մասին ասվում է ԵՄ դիվանագիտության ղեկավար Ժոզեպ Բորելի հայտարարության մեջ:

«Եվրամիությունը խստորեն դատապարտում է Թուրքիայի միակողմանի քայլերը և Թուրքիայի նախագահի, ինչպես նաև Կիպրոսի թուրք առաջնորդի անընդունելի հայտարարությունները՝ արված 2021 թվականի հուլիսի 20-ին ցանկապատված Վարոշա քաղաքի հետագա բացման վերաբերյալ»,- ասվում է հայտարարության մեջ:

Ըստ Բորելի՝ «ԵՄ-ն նաև կոչ է անում անհապաղ չեղարկել բոլոր գործողություններն ու քայլերը, որոնք ձեռնարկվել են Վարոշայի հետ կապված՝ 2020 թվականի հոկտեմբերից»:

Փաստաթղթում ընդգծվում է, որ «ԵՄ-ն վերահաստատում է միջազգային իրավունքը խախտող միակողմանի գործողություններից և նոր սադրանքներից խուսափելու անհրաժեշտությունը, որոնք կարող են լարվածություն առաջացնել կղզում և վտանգել կողմերի միջև ընդհանուր լեզու գտնելու շարունակական ջանքերը՝ ուղղված Կիպրոսի հիմնախնդրի տևական լուծմանը՝ ՄԱԿ-ի Անվտանգության խորհրդի բանաձևերին համապատասխան»:

Թուրքիայի արտաքին գործերի նախարարությունը քննադատել է ԵՄ դիվանագիտության ղեկավար Բորելի հայտարարությունները։ Նախարարությունը շեշտել է, որ Անկարան որևէ նշանակություն չի տալիս դրանց:

«Նման հայտարարությունները, որոնք անտեսում են Կիպրոսի թուրքերին, հեռու են փաստերից և արտացոլում են միայն կիպրական հույների տեսակետը: Մեր տեսանկյունից՝ դրանք ոչ մի իմաստ կամ ուժ չունեն»,- ասվում է Թուրքիայի ԱԳՆ խոսնակ Թանժու Բիլգիչի հայտարարության մեջ: