Երևան-Սևան ճանապարհին մերկասառույցի պատճառով բախվել են 20-ից ավելի ավտոմեքենաներ, մի քանիսը գլխիվայր շրջվել են

Այսօր՝ փետրվարի 5-ին, արտակարգ իրավիճակ է ստեղծվել Կոտայքի մարզում։   Այս մասին հայտնում է SHAMSHYAN.com-ը:

Ժամը 08։30-ից 10։00-ն ընկած ժամանակահատվածում Երևան-Սևան ավտոճանապարհի 15-16 կմ հատվածում ճանապարհի մերկասառույցի պատճառով բախվել են 20-ից ավելի ավտոմեքենաներ։ Ինչպես վթարի վայրից հայտնում է ֆոտոլրագրող Գագիկ Շամշյանը, ավտոմեքենաներից մի քանիսը բախվել են երկաթե արգելապատնեշներին, 2-ը գլխիվայր շրջվել են, մի քանիսն էլ՝ կողաշրջվել։

Ոստիկանությունը պարզում է վարորդների ինքնությունը։ 

Վթարի մեջ հայտնված վարորդները ֆոտոլրագրողի հետ զրույցում ասում էին. «Ամբողջ ճանապարհը մերկասառույց էր, հայելի։ Ոչ աղ էր լցված, ոչ ավազ։ Դրա համար էլ 20-ից ավելի ավտոմեքենաներ բախվեցին իրար։ Մի քանի ավտոմեքենաներ նույնիսկ չսպասեցին ԱՊՊԱ-ին։ Իրենց ուժերով դարձի բերեցին մեքենաները ու քարշակներով տեղափոխեցին։ Եթե ճանապարհը սպասարկող կազմակերպությունը ժամանակին կատարեր աղ ու ավազով մշակման աշխատանքներ, այս բարձիթողի վիճակը չէր լինի։ Վթարից 1,5 ժամ հետո նոր բարեհաճեցին իրենց գործը անեն»։

Ֆոտոլրագրողը հայտնում է նաև, որ վթարված ավտոմեքենաներն են Mercedes-ներ, Nissan-ներ, Opel-ներ, Mitsubishi-ներ և այլն։