Թուրքիան սկսել է «Ձմեռային արծիվ» օդային գործողությունը քուրդ զինյալների դեմ Սիրիայում և Իրաքում

Թուրքիայի ռազմաօդային ուժերը «Ձմեռային արծիվ» (Kış Kartalı) օդային գործողությունն են իրականացրել PKK/KCK/YPG զինյալների դեմ Դերիք, Սինջար և Քարաջաք շրջաններում, որոնք հենակետեր են Հյուսիսային Իրաքում և Սիրիայում։ Այս մասին ասվում է Թուրքիայի ազգային պաշտպանության նախարարության հաղորդագրության մեջ։

Հաղորդագրության համաձայն՝ հարձակումներ են իրականացվել քրդերի ապաստարանների, կացարանների, քարանձավների, թունելների, զինամթերքի պահեստների, ինչպես նաև շտաբների և ուսումնական ճամբարների վրա։

Թուրքերը նշում են, որ «Ձմեռային արծիվ» գործողությունը մեկնարկել է միջազգային իրավունքի, ՄԱԿ-ի կանոնադրության 51-րդ հոդվածի համաձայն, որը նախատեսում է պետության անօտարելի իրավունքը՝  ինքնապաշտպանության իրավունքի իրականացման համար ռազմական ուժի դիմելը, նաև՝ ի կատարումն ՄԱԿ-ի Անվտանգության խորհրդի՝ ահաբեկչություն դեմ պայքարի բանաձևերի։