«Ադրբեջանը քրիստոնեություն ընդունել է 313 թվականին». ԱՄՆ-ում Ադրբեջանի հյուպատոս Աղաևը ծաղրի առարկա է դարձել

Լոս Անջելեսում Ադրբեջանի գլխավոր հյուպատոս Նասիմի Աղաևը կաթոլիկների Սուրբ Ծննդի առթիվ գրառում է կատարել Twitter-ի իր միկրոբլոգում։

Նա պնդել է, թե Ադրբեջանն ունի «հին քրիստոնեական ժառանգություն», որպես իր խոսքի ապացույց՝  օգտագործել է Արցախի հին հայկական վանքերի և եկեղեցիների  լուսանկարները։

«Այս Սուրբ Ծննդյան օրը եկեք նայենք հին ադրբեջանական քրիստոնեական ժառանգության այս գեղեցիկ պատկերներին: Քրիստոնեությունը Ադրբեջան է մտել 1-ին դարում՝ պետական կրոն դառնալով 313 թվականին։ Այսօր հարյուրհազարավոր քրիստոնյաներ ապրում են խաղաղ և ազատորեն դավանում են Ադրբեջանում»,- գրել է Աղաևը։

Ամերիկայի Հայ դատի հանձնախումբը (ANCA) ուշադրություն է հրավիրել Ադրբեջանի գլխավոր հյուպատոսի գրառմանը։

«Ադրբեջանի «Սուրբծննդյան բացիկը». այս կեղծ թվիթը պնդում է, որ գոյություն ունեն «ադրբեջանական քրիստոնեական եկեղեցիներ», և որ Ադրբեջանը քրիստոնեական պետություն է դարձել 313 թվականին»,- գրել է ANCA-ն Facebook-ում։

Նասիմի Աղաևի հրատարակած կոլաժում 9-րդ դարի հայկական Դադիվանքի (Քարվաճառում, 44-օրյա պատերազմից հետո Ադրբեջանի վերահսկողության տակ անցած) վանական համալիրի լուսանկարներն են, նաև՝ 10-րդ դարի հայկական Գանձասարի վանական համալիրը (Մարտակերտի շրջան), Քաշաթաղի շրջանի վաղ միջնադարյան Ծիծեռնավանքը (44-օրյա պատերազմի արդյունքներով անցել է Ադրբեջանի վերահսկողության տակ):