Մասնակցություն՝ 19 համայնքում. ՀՅԴ-ն, որպես ընդդիմություն, առաջին տեղում է

Դեկտեմբերի 5-ին հանրապետության 36 խոշորացված համայնքներում տեղի են ունենալու  ՏԻՄ ընտրություններ, որոնց մասնակցում են 2 տասնյակից ավելի քաղաքական ուժեր և դաշինքներ:  

Չհաշված իշխող «Քաղաքացիական պայմանագիր» կուսակցությանը, որն իր պետական - վարչական ողջ ռեսուրսը ծախսում է տեղական ինքնակառավարման մարմինները նվաճելու համար, իր մասնակցությամբ հաջորդում է Հայ Յեղափոխական Դաշնակցությունը: Այն դեկտեմբերի 5-ին կայանալիք ՏԻՄ ընտրություններին մասնակցում է 19 համայնքում, որոնցից 10-ում՝ կուսակցական ցուցակով, 9-ում՝ դաշինքով:

Ընտրություններին մասնակցող շատ ուժեր, որոնք ներկայանում են իբրև ընդդիմադիր կամ այլընտրանք, պարզորոշ երևում է, որ մասնակցում են, որպեսզի ավագանի մուտք գործելու պարագայում դաշինք կազմեն ՔՊ-ի հետ:

Դաշնակցության թեկնածուների դիրքորոշումը հստակ է՝ ցանկացած ուժ նախընտրական փուլում պետք է հայտարարի, որ ավագանիում որևէ կերպ չի պաշտպանելու ՔՊ-ին՝ դրանով հաստատելով, որ չի հանդիսանում կեղծ ընդդիմություն:

Ընտրությունների օրը քվեաթերթիկ ընտրելիս, կարծում ենք, ընտրողը պետք է հաշվի առնի հենց այդ հանգամանքը, այն է՝ իր համայնքում ո՞ր ուժերն են հայտարարել այդ մասին:

Վահե Սարգսյան