Ադրբեջանցիները սկսել են սպառնալ Յուրի Կոտենոկին ադրբեջանական ուղղաթիռի կործանման վերաբերյալ գրառման համար

Ռուս ռազմական լրագրող, Շուշիի Ղազանչեցոց եկեղեցում ադրբեջանական հարձակման հետևանքով վիրավորված Յուրի Կոտենոկը իր թելեգրամյան ալիքում անդրադարձել էր նոյեմբերի 30-ին Ադրբեջանում ուղղաթիռի կործանմանը, որի հետևանքով մոտ 14 ադրբեջանցի սպա էր ոչնչացել, և նշել, որ ադրբեջանցիները դրանում տեսնում են հայկական կամ ռուսական հետք:

Դրանից հետո Կոտենոկը ևս մեկ գրառում էր արել. «Եթե անկեղծ, առանց նեղանալու՝ ով սպանել է, նա էլ սպանվել է: Մեկ տարի առաջ նրանք մեր Մի-24-ն էին խոցել (նկատի ունի 2020 թ. նոյեմբերի 9-ին ռուսական ուղղաթիռի խոցումը Երասխում` խմբ.): Երբ երկրային պատասխանն ուշանում է, պատասխանը գալիս է Երկնքից»:

Դրանից հետո ադրբեջանցիները սկսել էին տարատեսակ սպառնալիքներ հնչեցնել նրա հասցեին, տեղադրել էին լրագրողի հեռախոսահամարը, ինչպես նաև ափսոսանք հայտնել, որ Կոտենոկը չի սպանվել Շուշիում հրթիռի հարվածից:

Ռուս մեկ այլ ռազմական թղթակից Ալեքսանդր Կոցը, որը նույնպես պատերազմի ժամանակ Արցախում էր, գրել է. «Դուք հրթիռով չկարողացաք սպանել Կոտենոկին, ձեզ թվում է` ձեր զանգերը նրան ցավեցնո՞ւմ են»: