Մեծ Բրիտանիան և Իսրայելը ցանկանում են համագործակցել՝ կանխելու համար Իրանի՝ միջուկային տերություն դառնալը

Մեծ Բրիտանիան և Իսրայելը վճռական են, որ թույլ չտան Իրանի՝ միջուկային տերություն դառնալը։ Այսպիսի հայտարարություն են արել երկու պետությունների արտգործնախարարներ Լիզ Թրուսը և Յաիր Լապիդը բրիտանական The Telegraph թերթի համար համատեղ հոդվածում։

«Մենք օր ու գիշեր աշխատելու ենք, որպեսզի Իրանի ռեժիմը երբևէ միջուկային տերություն չդառնա: Ժամանակը սպառվում է, ինչը մեծացնում է մեր գործընկերների և ընկերների հետ սերտ համագործակցության անհրաժեշտությունը՝ տապալելու համար Թեհրանի հավակնությունները»,- ասվում է հրապարակման մեջ։

Սպասվում է, որ նոյեմբերի 29-ին կստորագրվի տասնամյա համաձայնագիր, որը հնարավորություն կտա երկու երկրներին ավելի սերտ աշխատելու այնպիսի հարցերի շուրջ, ինչպիսիք են կիբերանվտանգությունը, տեխնոլոգիաների զարգացումը, պաշտպանությունը, առևտուրը և գիտությունը:

Հիշեցնենք, որ նոյեմբերի 29-ին Իրանը Վիեննայում կվերսկսի իրանական միջուկային ծրագրի՝ Գործողությունների համատեղ համապարփակ ծրագրի (JCPOA) շուրջ բանակցությունները։ Իրանից բացի, բանակցություններին կմասնակցեն Չինաստանի, Ֆրանսիայի, Գերմանիայի, Ռուսաստանի եւ Մեծ Բրիտանիայի ներկայացուցիչները։