ԱԺ-ն երկու նոր պատգամավոր ունի. նրանցից երդվեց միայն մեկը. Ասպրամ Կրպեյանը բոյկոտի շրջանակում լքել էր դահլիճը

Հայաստանի Ազգային ժողովը երկու նոր պատգամավոր ունի: Այսօր՝ նոյեմբերի 16-ին, ԱԺ նախագահ Ալեն Սիմոնյանը տեղեկացրեց ԿԸՀ երկու արձանագրությունների մասին, ըստ որոնց՝ ԱԺ պատգամավոր են դարձել «Հայաստան» դաշինքից Ասպրամ Կրպեյանը եւ «Քաղաքացիական պայմանագիր» կուսակցությունից Միքայել Թումասյանը:

«Հիմա նորընտիր պատգամավորները, ըստ ԱԺ կանոնակարգ օրենքի, պետք է երդվեն: Տիկին Կրպեյանը, ըստ ամենայնի, դեռ պատգամավոր չէ, որովհետեւ չի երդվի այս պահին, նա ներկա չէ դահլիճում: Պարո՛ն Թումասյան, համեցեք ամբիոնի մոտ»,- ասաց Ալեն Սիմոնյանը:

Միքայել Թումասյանը ԱԺ ամբիոնից հնչեցրեց երդման տեքստը:

Հիշեցնենք, որ «Հայաստան» խմբակցությունից պատգամավորական մանդատից հրաժարվել էր ԱԺ նախկին պատգամավոր Մհեր Սեդրակյանի որդին՝ Դավիթ  Սեդրակյանը, որին ցուցակում հաջորդում էր Գորիսի քաղաքապետ Առուշ Առուշանյանը, որը նույնպես հայտարարությամբ հրաժարվել էր մանդատից: Հետեւաբար, մանդատը բաժին էր հասել դաշինքի ցուցակում հաջորդ թեկնածու Ասպրամ Կրպեյանին:

Իսկ ՔՊ խմբակցությունից Նազելի Բաղդասարյանն օրերս նշանակվել է Շիրակի մարզպետ եւ նրա մանդատը բաժին է հասել Միքայել Թումասյանին: