Կառավարությունը գերիների թի՞վն էլ է պլյուս-մինուսով որոշում

Մինչ օրս Ադրբեջանի Հանրապետությունը Հայաստանի Հանրապետությանն է հանձնել գերեվարված՝ ընդհանուր թվով 114 զինծառայող և քաղաքացիական անձ: Այս մասին «Հայաստան» խմբակցության հարցմանն ի պատասխան հայտնել էր ՀՀ աշխատանքի և սոցիալական հարցերի նախարար Նարեկ Մկրտչյանը:

Հետաքրքրական է, որ այս հայտարարությունից ժամեր անց ՌԴ արտաքին գործերի նախարարությունը հաղորդագրություն տարածեց, որում նշվում էր նաև գերիների մասին: Ըստ այդմ՝ այդտեղ նշվում է, որ 2020 թվականի դեկտեմբերի 2-ից ռուս խաղաղապահների մասնակցությամբ  վերադարձվել է, ընդհանուր առմամբ, 122 գերի. Հայաստանին է վերադարձվել 105 գերի, Ադրբեջանին՝ 17:

Ստացվում է, որ ՀՀ սոցապ նախարարության և ՌԴ ԱԳՆ  թվերի միջև անհամապատասխանություն կա, սոցապ նախարարության տվյալը 9-ով ավելի է:

Ի դեպ, եկեք հիշենք, որ Արցախից բռնազավթած տարածքների ականապատ քարտեզների դիմաց Ադրբեջանը 15 գերի էր վերադարձրել։ Փոխանակումն իրականացվել էր ամերիկյան կողմի միջնորդությամբ։ Բայց նույնիսկ այս դեպքում ռուս խաղաղապահների և ամերիկյան կողմի ջանքերով վերադարձված  գերիների ընդհանուր թիվը պետք է լիներ 120, այնինչ՝ հայկական կողմը նշում է 114 թիվը:

Հուսանք՝ կտրվի պատասխան, թե որն է այս հակասության պատճառը և ինչով է պայմանավորված թվերի անհամապատասխանությունը, որովհետև, ի վերջո, խոսքը հայ զինծառայողների, մարդկային կյանքերի և ճակատագրերի մասին է, և Փաշինյանի՝ զոհերի թվին վերաբերող «պլյու-մինուս» մոտեցումը չի կարող գործել: