Իրանն ու Սաուդյան Արաբիան հաշտվել են. կվերաբացվեն հյուպատոսարանները

Իրանն ու Սաուդյան Արաբիան բանակցություններ են վարել երկու երկրներում հյուպատոսություններ վերաբացելու համաձայնագրի շուրջ: Այս մասին հայտնում է France-Presse-ը՝ դիվանագիտական աղբյուրին հղումով:

«Նրանք համաձայնության են եկել հյուպատոսությունների աշխատանքը վերսկսելու վերաբերյալ: Կարծում եմ՝ մոտակա շաբաթներին ձեռք կբերվի համաձայնություն հարաբերությունների կարգավորման վերաբերյալ»,- ասել է գործակալության աղբյուրը:

Ավելի վաղ Իրանի ԱԳՆ խոսնակ Սաիդ Խաթիբզադեն հայտարարել էր, որ այս պահին Թեհրանի և Էր Ռիադի միջև բանակցությունների հինգ փուլ է տեղի ունեցել՝ չորսը՝ Բաղդադում, մեկը` Նյու Յորքում՝ ՄԱԿ-ի Գլխավոր ասամբլեայի շրջանակում: Նրա խոսքով՝ երկխոսությունը կենտրոնացած է երկկողմ եւ տարածաշրջանային խնդիրների վրա, այդ թվում՝ Պարսից ծոցում և Եմենում տիրող իրավիճակի:

Հիշեցնենք՝ 2016-ի հունվարի 2-ին Սաուդյան Արաբիան մահապատժի դատապարտեց 47 բանտարկյալի՝ ահաբեկչության մեղադրանքով, այդ թվում՝ ազդեցիկ շիա աստվածաբան շեյխ Նիմր ալ Նիմրին, ինչը խստորեն դատապարտվեց Իրանում: Նույն երեկոյան իրանցի ցուցարարները հարձակվեցին Իրանում Սաուդյան Արաբիայի դեսպանատան վրա, իսկ հունվարի 3-ին Սաուդյան Արաբիան հայտարարեց Իրանի հետ դիվանագիտական հարաբերությունների խզման մասին: