«Թալիբան»-ը ցանկանում է ամուր հարաբերություններ հաստատել Թուրքիայի հետ

Թալիբները պատրաստ են ամուր հարաբերություններ հաստատել Թուրքիայի հետ. հայտարարել է Աֆղանստանում կազմակերպության ժամանակավոր կառավարության արտաքին գործերի նախարարի պաշտոնակատարը:

Աֆղանստանի մայրաքաղաք Քաբուլում ունեցած առաջին մամուլի ասուլիսում Ամիր Խան Մութաքին ասել է, որ թալիբները նաև լավ հարաբերություններ են ցանկանում այլ երկրների հետ. հաղորդում է Sabah-ը:

Մութաքին, նշելով, որ իրենք կապեր են պահպանում թուրքական իշխանությունների հետ, բացատրել է, որ ակնկալում են, որ Թուրքիան կաջակցի Աֆղանստանի ժողովրդին և կօգնի ենթակառուցվածքների աշխատանքներին, հատկապես՝ Քաբուլի միջազգային օդանավակայանի վերականգնման գործում:

Հավելենք, որ նախագահ Ռեջեփ Թայիփ Էրդողանը պաշտպանել է «Թալիբան»-ի պաշտոնյաների չափավոր հայտարարությունները և հայտարարել, որ Թուրքիան պատրաստ է համագործակցել բոլոր կողմերի հետ՝ խաղաղություն և կայունություն ապահովելու համար: Ժամանակավոր կառավարության հայտարարությունից հետո Էրդողանն ասել է, որ Թուրքիան ուշադիր հետևելու է Աֆղանստանում տեղի ունեցող իրադարձություններին: