ՏԵՍԱՆՅՈՒԹ․ Հավանական է՝ մարտեր լինեն այն հատվածներում, որտեղ թշնամին բավականին ագրեսիվ է․ Տիգրան Աբրահամյան

Այս իշխանության քայլերը վտանգավոր հետեւանքներ են ունենալու նաեւ հետագայում՝ անկախ այն բանից, թե ով կլինի իշխանության։ Հայաստանի իշխանությունների այս քաղաքականությունը տարիներ անց բերելու է Հայաստանի Հանրապետության սուվերեն տարածքների էական կորստի․ Yerkri.am-ի հետ զրույցում ասաց ԱԺ «Պատիվ ունեմ» խմբակցության անդամ Տիգրան Աբրահամյանը։

«Բոլոր այն բնակավայրերը, որոնց նկատմամբ Ադրբեջանը հավակնություններ է ունենում, այս իշխանությունը, հետագայում դրանց հանձնումը արդարացնելու համար, հանրային անհրաժեշտ ֆոն է ապահովում՝ ցույց տալու, որ այդ տարածքներն ադրբեջանական են»,- ասաց նա։

Անդրադառնալով ՀՀ իշխանությունների կողմից զինված ուժերի մարտունակության բարձրացման գործընթացին՝ պատգամավորը շեշտեց՝ բանակի բարեփոխումների, մարտունակության բարձրացման ուղղությամբ  այս իշխանություններն առ այսօր որեւէ քայլ չեն ձեռնարկել։  

«Շատ դժվար է մեկնաբանել, թե այսօր ինչ է տեղի ունենում զինված ուժերում, որովհետեւ տեսանելիության դաշտում որեւէ բան այս պահին չկա»,- ասաց նա։

Խոսելով հնարավոր պատերազմից՝ Աբրահամյանը նշեց, որ լայնամասշտաբ ռազմական գործողությունների հնարավարություն կարճաժամկետ կտրվածքով չի տեսնում, հավանական է համարում լոկալ մարտերը, հատկապես՝ այն հատվածներում, որտեղ թշնամին բավականին ագրեսիվ է տրամադրված։

«Մասշտաբային գործողությունների համար կան ռեգիոնալ արգելքներ, կան նաեւ ՌԴ-ի մոտեցումները, որոնք բխում են նրա իսկ շահերից։ Այս փուլում լայնամասշտաբ ռազմական գործողություններ չեմ տեսնում»,- ասաց նա։

Լիանա Սարգսյան