Թալիբները պնդում են, որ ամբողջությամբ գրավել են Փանջշիր նահանգը

Աֆղանստանի հյուսիս-արևելքում գտնվող Փանջշիր նահանգը լիովին անցել է թալիբների վերահսկողության տակ: Այս մասին Twitter-ում հայտնել է «Թալիբան» շարժման ներկայացուցիչ Զաբիուլլահ Մոջահիդը:

Նրա խոսքով՝ թալիբները հաղթել են Աֆղանստանի ժողովրդական դիմադրության ճակատին՝ Փանջշիրում զինված խմբերի հովանավոր կազմակերպությանը:

«Թշնամիների վերջին հենակետը՝ Փանջշիր նահանգը, ամբողջությամբ գրավված է»,- գրել է Մոջահիդը:

Շարժման ներկայացուցիչը նշել է, որ Փանջշիրի գրավմամբ երկրում պատերազմն ամբողջությամբ ավարտված է:

Աֆղանստանի ժողովրդական դիմադրության ճակատը՝ պաշտպանության նախկին նախարար Ահմեդ Շահ Մասուդի որդու՝ Ահմեդ Մասուդի գլխավորությամբ, օգոստոսի 15-ին թալիբների՝ Քաբուլը գրավելուց հետո մի շարք պահանջներ էր ներկայացրել «Թալիբան»-ին՝ կառավարման նոր համակարգի վերաբերյալ:

Բանակցություններն անհաջող էին, և թալիբները ռազմական ուժեր տեղակայեցին այդ տարածքում:

Հաղորդվում է, որ մոտ մեկ շաբաթ տևած բախումներում երկու կողմերն էլ մեծ կորուստներ են կրել: