Թալիբները գրավել են անցակետ Իրանի հետ սահմանին

«Թալիբան» շարժման գրոհայինները գրավել են աֆղանա-իրանական սահմանի անցակետերից մեկը. հինգշաբթի հաղորդել է «Ասոշիեյթիդ պրես»-ը (AP)՝ վկայակոչելով աֆղանցի պաշտոնյայի և տեղական լրատվամիջոցներ:

Սա առաջին դեպքը չէ, երբ «Թալիբան»-ը վերահսկողություն է հաստատում աֆղանական սահմանային անցակետի վրա: Associated Press-ը նշում է, որ նրանք նախկինում գրավել էին Տաջիկստանի ու Ուզբեկստանի հետ սահմանների մոտ գտնվող տարածքները:

«Թալիբան»-ի խոսնակը Twitter-ում հայտնել է, որ գրոհայիններին ջերմորեն են ընդունել տեղի բնակիչները՝ Իսլամ Քալա քաղաքում, որտեղ գտնվում է անցակետը: Իսլամ Քալան սահմանամերձ բնակավայր է արևմտյան Հերաթ նահանգում՝ նահանգի համանուն մայրաքաղաքից 120 կմ հեռու:

Ըստ իրանական ԶԼՄ-ների՝ քաղաքում գտնվող աֆղանցի զինվորները լքել են դիրքերը և ուղևորվել Իրան՝ ապաստան գտնելու: