Ավելի բարդ կդառնա. Բայդենի կարծիքով՝ 10 տարի անց աշխարհը կտրուկ կփոխվի

Առաջիկա տասը տարիների ընթացքում աշխարհն ավելի շատ կփոխվի, քան նախորդ կես դարում. հայտարարել է ԱՄՆ նախագահ Ջո Բայդենը ԱՄՆ ազգային հետախուզության աշխատակիցների հետ զրույցում։

«Աշխարհն այնքան արագ է փոխվում՝ տեխնոլոգիական տեսանկյունից՝ մարդկանց միջև դաշինքների և փոխազդեցությունների առումով, որ առաջիկա 10 տարիներին ամեն ինչ կփոխվի բոլոր առումներով ավելի, քան նախորդ 50 տարիներին: Սա չափազանցություն չէ, այլ փաստ» - ասել է նա:

«Եթե ես 15 տարի առաջ սկսեի ձեզ հետ խոսել գերձայնի մասին, դուք ինձ գժի տեղ կդնեիք»,- ավելացրել է Բայդենը:

«Շատ բան կփոխվի... Իսկապես կդառնա ավելի դժվար։ Սպառնալիքներն աշխարհագրորեն ավելի բազմազան կլինեն, քան 20 տարի առաջ»,- նշել է ԱՄՆ նախագահը: