Էրդողանը թարմացրել է թուրքական ոստիկանության ղեկավար կազմը՝ հեղաշրջման փորձի 5-ամյակին ընդառաջ

Թուրքիայի նախագահ Ռեջեփ Թայիփ Էրդողանը լայնամասշտաբ վերադասավորումներ է իրականացրել երկրի ոստիկանության ղեկավարման կազմում՝ փոխարինելով երկրի 81 նահանգներից 33-ի ներքին գործերի վարչությունների պետերին. այսօր՝ հուլիսի 7-ին, հայտնում է Resmi Gazete-ի թուրքական պաշտոնական պարբերականը:

Իր հրամանագրով պետության ղեկավարը ոստիկանության բարձրաստիճան սպաներին նշանակել է որպես անվտանգության խորհրդականներ աշխարհի թուրքական դիվանագիտական 27 ներկայացուցչություններում՝ ներառյալ Վաշինգտոնում, Պեկինում, Լոնդոնում, Փարիզում և Աթենքում:

2016-ի հուլիսի 15-ի լույս 16-ի գիշերը ձախողված ռազմական հեղաշրջումից հետո Թուրքիայի կառավարությունը կատարել է կադրային փոփոխություններ ոստիկանության և անվտանգության այլ գերատեսչություններում: Հազարավոր ոստիկաններ, որոնք կասկածվում են իսլամական քարոզիչ Ֆեթուլլահ Գյուլենի շարժման հետ կապ ունենալու մեջ, որին իշխանություններն անվանում են «FETÖ ահաբեկչական ցանց» և մեղադրում հեղաշրջում կազմակերպելու մեջ, բանտարկվել են կամ հեռացվել ծառայությունից: