Ինչո՞ւ չի հրապարակվել ռազմական հեղաշրջման փորձի օրը Էրդողանի արտասանած մյուս ելույթը. նոր մանրամասներ

Թուրքիայում հուլիսի 15-ին տեղի ուենցած ռազմական հեղաշրջման փորձի մասին նոր տեսանյութ է հրապարակվել:

Ըստ Siyasihaber-ի՝ Gündem թերթի խմբագիր Թեմել Ըրմաքի կողմից արված տեսանյութը երեկ հայտնվել է համացանցում, որում հանգստյան նպատակով Մարմարիսում գտնվող Էրդողանը լրագրողներին է ներկայացնում կատարվածը՝ միաժամանակ խոստումներ տալով, որ նման միջոցառում ձեռնարկողներն անպատիժ չեն մնալու: Պարզվում է` դեռևս հուլիսի 15-ին  թուրքական բոլոր կայքերի հրապարակած՝ Էրդողանի ելույթը չի եղել հեղաշրջման փորձից հետո առաջինը:

Լրատվամիջոցները դեռևս չեն կարողացել իմաստավորել Էրդողանի առաջին ելույթը ոչ մի կայքում չհրապարակելու, անգամ՝ դրա մասին չխոսելու իմաստը, սակայն մի շարք լրագրողներ համոզված են, որ դրա տակ ինչ-որ բան կա թաքնված:

Հիշեցնենք, որ ռազմական հեղաշրջման փորձի օրը նախագահ Էրդողանը անհայտ վայրից FaceTime-ի միջոցով կապ էր հաստատել CNNTurk-ի հետ: Նա երկրի քաղաքացիներին կոչ էր արել խուճապի չմատնվել և դուրս գալ կատարված ապօրինության դեմ պայքարի: «Ներում չի լինելու այն մարդկանց, ովքեր արեցին սա: Նրանք շատ բարձր գին են վճարելու»,- ասել էր Էրդողանը: