Ժամանակն է ահազանգել Թուրքիայի մասին. Բոլթոնը զգուշացրել է Թուրքիայի մերձռուսական քաղաքականության մասին

ԱՄՆ նախագահի՝ ազգային անվտանգության հարցերով նախկին խորհրդական Ջոն Բոլթոնը միացել է «Թուրքիայի ժողովրդավարություն» նորաստեղծ նախագծի խորհրդատվական խորհրդին:

«Ժամանակն է ահազանգել Թուրքիայի մասին,- գրել է Բոլթոնը Twitter-ում։ - Ավտորիտար առաջնորդի օրոք ՆԱՏՕ-ի երբեմնի դաշնակիցը հեռանում է ժողովրդավարությունից և մերձենում Ռուսաստանին: Ուրախ եմ միանալ «Թուրքիայի ժողովրդավարություն» նախագծի խորհրդատվական խորհրդին`լուսավորելու համար ստեղծված ծանր իրավիճակը»:

Turkish Democracy Project -Թուրքական ժողովրդավարության նախագիծը միջազգային քաղաքական կազմակերպություն է, «որը ստեղծվել է ի պատասխան Թուրքիայի վերջին շրջադարձի ժողովրդավարությունից դեպի ավտորիտարիզմ»:

Խորհրդատվական խորհրդի մյուս անդամներից են Ֆլորիդայի նախկին նահանգապետ Ջեբ Բուշը և Իտալիայի նախկին արտգործնախարար Ջուլիո Թերզի դի Սանտ'Ագատան:

Ջոն Բոլթոնը զբաղեցնում էր ԱՄՆ նախկին նախագահ Դոնալդ Թրամփի՝ ազգային անվտանգության հարցերով խորհրդականի պաշտոնը: Դրանից հետո նա քննադատել էր իր նախկին ղեկավարի սերտ հարաբերությունները Թուրքիայի նախագահ Ռեջեփ Թայիփ Էրդողանի հետ՝ ասելով, որ Թրամփը սիրում է «անձնական ծառայություններ մատուցել իրեն դուր եկած բռնապետերին»: