Արթուր Վանեցյանը շատ առանցքային դեր է ունենալու արտահերթ ընտրություններում. Սոս Հակոբյան

Հիմք ընդունելով այսօր Հայաստանում իրեն իշխանություն համարող աղետաբեր և պարտվողական վարչախմբին րոպե առաջ հեռացնելու հրամայականը` «Հայրենիք» կուսակցության խորհուրդը որոշել է մասնակցել հնարավոր արտահերթ խորհրդարանական ընտրություններին և սկսել Հայաստանի Հանրապետական կուսակցության հետ դաշինք կազմելու գործընթաց. այսօր հրավիրված մամուլի ասուլիսում հայտարարեց կուսակցության մամուլի քարտուղար Սոս Հակոբյանը։

«Այս պահին հստակ է միայն դաշինքով գնալու որոշումը։ Ցուցակի, դաշինքի անվան, ծրագրային դրույթների վերաբերյալ դեռևս աշխատանքներ են իրականացվում, և երբ ընտրությունների վերաբերյալ հրամանագիրը լինի, դրանք կհրապարակվեն», - ասաց Հակոբյանը։

Կուսակցության մամուլի քարտուղարի խոսքով՝ այնպիսի մարդիկ, որոնց համերաշխությունն օրենքի հետ կարող է կասկածի տակ դրվել, ցուցակում չեն կարող լինել.  «Լինելու են մարդիկ, որոնք հանրության շրջանում ունեն վստահություն և կարող են օգտակար լինել ՀՀ-ին իրեն կարողությունների շրջանակներում»։

Ինչ վերաբերում է կուսակցության նախագահ Արթուր Վանեցյանին, Սոս Հակոբյանն ասաց հետևյալը. «Արթուր Վանեցյանը շատ առանցքային դեր է ունենալու արտահերթ ընտրություններում և ամբողջ քաղաքական գործընթացում, ինչպես նաև` մեր հետ դաշինքի գնացող ուժի ղեկավարը։ Բայց թե ով կլինի ցուցակի առաջին համարում, դա քննարկվող հարց է, և դեռ հստակեցում չկա»։