Ռուսաստանն առանցքային դեր է խաղում ԼՂ հակամարտության կարգավորման գործընթացում. Արմեն Սարգսյան

ՀՀ 4-րդ նախագահ Արմեն Սարգսյանը հարցազրույց է տվել ռուսական ТАСС գործակալությանը, որում հայտարարել է, որ չափազանց կարևոր և առանցքային է համարում Ռուսաստանի դերը ԼՂ հակամարտության կարգավորման գործընթացում:

Նրա խոսքով` 23 տարի առաջ Ղարաբաղում եռակողմ հրադադարը ձեռք է բերվել հենց Ռուսաստանի միջնորդության շնորհիվ:

 «Մենք բարձր ենք գնահատում այդ միջնորդական ջանքերը խնդրի խաղաղ կարգավորման որոնումներում: Ակնհայտ է, որ խնդրի կարգավորման համար անհրաժեշտ է խաղաղության և համաձայնության գալու քաղաքական կամք: Իր կողմից Հայաստանն անում է հնարավոր ամեն բան խաղաղության ձեռք բերման համար և ակնկալում, որ ադրբեջանական կողմը նույն կերպ կվարվի»,- ասել է ՀՀ նախագահը:

Արմեն Սարգսյանը նաև հայտնել է մոտ ժամանակներս Մոսկվա այցելելու ծրագրերի մասին: «Բնականաբար, հետաքրքրված կլինեմ, որպես նախագահ, այցելել Մոսկվա»,- նշել է նա`ասելով, որ հստակ ժամկետներ դեռ չկան:

 Սարգսյանը նշել է, որ, որպես ՀՀ նախագահ, իր խնդիրն է համարում հայ-ռուսական ռազմավարական դաշնակցության հետագա զարգացումը, երկու ժողովուրդների բարեկամության ամրապնդումը և մարդկային շփումների զարգացումը: