Թուրքիան 2020-ին դարձել է ԵՄ-ից աղբի խոշորագույն ներկրողը. Greenpeace

Ըստ Greenpeace Mediterranean-ի՝ 2020 թվականին Եվրամիությունից աղբ ներկրող երկրների շարքում Թուրքիան զբաղեցրել է առաջին տեղը: Կազմակերպությունը հայտարարել է, որ Թուրքիան 2020-ին Եվրոպայից ներմուծել է շուրջ 660,000 տոննա պլաստիկ թափոն. գրում է Hurriyet-ը:

Greenpeace Mediterranean-ը, «Թույլ մի տվեք, որ Թուրքիան վերածվի պլաստիկ թափոնների աղբանոցի» կարգախոսով իրականացվող նախագիծը սկսելով, Անկարային կոչ է արել դադարեցնել աղբի ներկրումը:

«Թուրքիան ունի «Առանց թափոնների» (Zero Waste) նախագիծ: Սակայն պլաստիկ թափոնների ներմուծման պատճառով երկիրն ի վիճակի չէ հասնել այդ նպատակին», - ասել է Greenpeace Mediterranean կենսաբազմազանության պահպանման ծրագրի ղեկավար Նիհան Թեմիզ Աթաշը:

Greenpeace-ը նշում է, որ ներկրվող աղբը նետվում է բնություն: Նախկինում արված տեսաձայնագրությունները գրանցել են պլաստիկի այրում Թուրքիայի հարավում գտնվող Ադանա նահանգում՝ 2020 թվականի նոյեմբերին:

Աթաշը նշել է, որ Greenpeace-ի նախագծից հետո քաղաքաշինության և շրջակա միջավայրի նախարարությունը խստացրել է ներմուծման քվոտաները:

«Սա լավ քայլ է, բայց՝ ոչ բավարար: Երկիրը դառնում է Եվրոպայում պլաստիկ թափոնների ամենամեծ աղբավայրը»,- հավելել է նա՝ տեղեկացնելով, որ աղբով 241 բեռնատար ամեն օր ժամանում է Թուրքիա:

2019-ին Թուրքիան ԵՄ-ից ներմուծել է շուրջ 582 հազար տոննա պլաստիկ թափոն: