Թուրքական ապրանքների արգե՞լք, թե՞ ապաշրջափակում. կառավարության հակասական հայտարարությունները. Թադևոս Ավետիսյան. Sputnik Արմենիա

Որպես փաստարկ Ավետիսյանը վկայակոչում է 2020 թվականին մեր երկրում օտարերկրյա ներդրումների ցուցանիշը, որը 2019-ի համեմատ կրճատվել է մոտ 123 անգամ` 38.1 միլիարդից հասնելով 311 միլիոն դրամի։

Նրա խոսքով` 2019-ին ևս ներդրումներն էապես կրճատվել են։ Եվ այսպիսի իրավիճակում, երբ էկոնոմիկայի գործող նախարարը հունվարի սկզբին խոսում էր միլիարդավոր դոլարների ներդրումների մասին, հույսը դրել էր թուրքական կապիտալի և տարածքների ապաշրջափակման վրա։ 

Ու դրան զուգահեռ, կառավարությունը շարունակում է հակասական հայտարարություններ անել. մե՛կ որոշում են, որ թուրքական ապրանքների մուտքը Հայաստան արգելել, մե՛կ հայտարարում տարածքների ապաշրջափակման մասին։ 

«Ասում էին, որ Թուրքիայի և Ադրբեջանի հետ մեր տնտեսական սերտաճումը կբերի նաև կյանքի որակի բարելավմանն ու տնտեսության զարգացմանը, հիմա էլ խոսում են թուրքական ապրանքների արգելքը շարունակելու մասին»,- նշեց Ավետիսյանը։ 

Հիշեցնենք, որ ՀՀ էկոնոմիկայի նախարար Վահան Քերոբյանը ԱԺ-ում կառավարության հետ հարցուպատասխանի ժամանակ ևս մեկ անգամ հայտարարեց, որ կառավարությունը թուրքական ապրանքների ներկրման արգելքը ևս մեկ անգամ կերկարաձգի` տեղի տնտեսվարողներին հնարավորություն տալով վերադասավորվել և ներդրումներ անել։

2020թ.-ին ընդունված որոշմամբ` Հայաստանում թուրքական ապրանքների 6-ամսյա արգելքն ուժի մեջ է մտել 2021թ․–ի հունվարի 1-ից։