Թուրքիայի հետազոտական և հորատման նավերի թիվը հասնելու է վեցի. Էրդողան

Թուրքիայի հետախուզական և հորատման նավատորմը շուտով կհասնի վեցի: Շատ ավելի շահավետ է ինքնուրույն գնել նավեր և հետախուզական աշխատանքներ կատարել խոստումնալից օֆշորային հանքավայրերում, քան դիմել արտասահմանյան նավթագազային ընկերությունների ծառայությանը: Այս մասին հայտարարել է Թուրքիայի նախագահ Ռեջեփ Թայիփ Էրդողանը՝ ելույթ ունենալով Իզմիր նահանգում իշխող «Արդարություն և զարգացում» կուսակցության գրասենյակի համագումարում. հաղորդում է Anadolu-ն:

Ըստ Թուրքիայի առաջնորդի՝ Անկարան նախկինում համաձայնագրեր է կնքել BP-ի եւ Chevron-ի հետ Սև ծովում հետախուզական աշխատանքների վերաբերյալ: «Սակայն շուտով պարզ դարձավ, որ շատ ավելի շահավետ է նավեր գնել և մեր կողմից հետախուզական աշխատանքներ անցկացնել»,- ասել է Էրդողանը:

Երկրի ղեկավարը նշել է, որ վերջին տարիներին Թուրքիան զգալի առաջընթաց է գրանցել տնտեսական ոլորտում, այդ թվում՝ էներգետիկ ոլորտում:

«2003-ին, երբ ես իշխանության եկա, Թուրքիայի Կենտրոնական բանկի արտարժույթի պահուստները 27,5 մլրդ դոլար էին: Այսօր այդ ցուցանիշը 95 միլիարդ դոլար է»,- ասել է Էրդողանը՝ հավելելով, որ այսօր Թուրքիայի պարտքը ԱՄՀ-ին զրո է։