Վրաստանում սողանքի զոհերի թիվը հասել է վեցի

Վրաստանի հրշեջ-փրկարարական ծառայության աշխատակիցները հայտնաբերել են եւս չորս մարդու մարմին Ռաչա տարածքի Շովի ամառանոցային քաղաքի սողանքի գոտում։ Այս մասին ՏԱՍՍ-ին տեղեկացրել են հանրապետության ՆԳՆ մամուլի ծառայությունում։

«Երեկ գտնվել էին երկու մարդկանց մարմիններ, իսկ այսօր՝ եւս չորսի։ Այսպիսով, զոհվածների թիվը հասել է վեցի»,- ասել է ՆԳՆ մամուլի ծառայության աշխատակիցը։

Ինչպես ավելի վաղ նշել էր Վրաստանի տարածքային կառավարման եւ ենթակառուցվածքի նախարար Իրակլի Կարսելաձեն, փրկարարները չեն կարողանում կապ հաստատել եւս 31 մարդու հետ։

Սողանքը Շովիում տեղի է ունեցել հինգշաբթի։ Վնասվել են կամուրջները եւ ճանապարհները, ինչպես նաեւ տուրիստական քոթեջներն ու «Սանսեթ Շովի» հյուրանոցը։ ՆԳՆ-ն անմիջապես սահմանապահ ոստիկանության երկու ուղղաթիռ է ուղարկել այնտեղ, ուրբաթ ավելի ուշ նրանց գումարվել են եւս երկու ուղղաթիռներ։ Երկու օրում հաջողվել է տարհանել 210 մարդու։