Ռուսաստանը փետրվարի 15-ից կվերսկսի թռիչքները Հայաստանի հետ

Ռուսաստանը փետրվարի 15-ից վերսկսում է փոխադարձ օդային հաղորդակցությունը Հայաստանի հետ: Մոսկվայի և Երևանի միջև շաբաթական չորս թռիչք կիրականացվի. չորեքշաբթի հաղորդել է Ռուսաստանի կառավարության մամուլի ծառայությունը:

«Որոշվել է 2021 թ. փետրվարի 15-ից վերսկսել փոխադարձ միջազգային թռիչքները Ադրբեջանի (Մոսկվա-Բաքու՝ շաբաթական երկու թռիչք) և Հայաստանի (Մոսկվա-Երևան՝ շաբաթական չորս թռիչք) հետ»,- ասվում է հայտարարության մեջ:

2020 թվականի մարտին Ռուսաստանը դադարեցրել էր բոլոր առևտրային և ուղևորային թռիչքները արտասահման՝ կորոնավիրուսի համաճարակի ֆոնին: Միջազգային օդային երթևեկության աստիճանական վերականգնումը սկսվել է նախորդ տարվա ամռանը: