ԱՄՆ-ի` Աֆղանստանում խաղաղության հարցերով բանագնացը կվերսկսի բանակցությունները «Թալիբան»-ի հետ. Reuters

ԱՄՆ-ի` Աֆղանստանում խաղաղության հարցերով հատուկ ներկայացուցիչ Զալմայ Խալիլզադը կվերսկսի խաղաղության վերաբերյալ բանակցությունները «Թալիբան» ահաբեկչական խմբավորման հետ. հայտնում է Reuters-ը` հղում անելով սեփական աղբյուրներին:

Խալիլզադը, որն արդեն իսկ 8 բանակցություն է վարել «Թալիբան»-ի հետ Աֆղանստանում 18 տարի շարունակվող պատերազմը դադարեցնելու համար, Քաբուլից Պակիստանով կմեկնի Քաթարի մայրաքաղաք Դոհա:

«Ես գնում եմ Դոհա, բայց ճանապարհին կանգ կառնեմ Իսլամաբադում: Դոհայում, եթե «Թալիբան»-ն անի, այն ինչ նրանից ակնկալվում է, մենք էլ մերը կանենք, ու արդյունքում կամփոփենք այն համաձայնագիրը, որի վրա աշխատում էինք»,-  իր թվիթերյան միկրոբլոգում գրել է Խալիլզադը:

Խալիլզադը Աֆղանստանում ծնված ամերիկյան դիվանագետ է, որն անցյալ տարի ուղարկվել էր բանակցությունների` «Թալիբան»-ի հետ քաղաքական հանգուցալուծման գալու համար, որն այժմ վերահսկում է ավելի շատ տարածք, քան երբևէ:

Նա Քաբուլ է ժամանել հուլիսին և հանդիպումներ ունեցել նախագահ Աշևաֆ Գհանի, անվտանգության ծառայության աշխատակիցների, ընդդիմադիր գործիչների, դիվանագետների ու քաղաքացիական հասարակության ներկայացուցիչների հետ` խաղաղություն հաստատելու գործընթացը քննարկելու նպատակով`մինչ «Թալիբան»-ի անդամների հետ գործարք կնքելը:  

Reuters-ի տեղեկություններով` համաձայնագիրը կարող է կնքվել օտարերկրյա ռազմական ուժերի դուրսբերմամբ` «Թալիբան»-ի կողմից անվտանգության երաշխիքների դիմաց: