Թրամփը, Նավալնին, ՆԱՏՕ–ն և բելառուս ակտիվիստները առաջադրվել են Նոբելյան մրցանակի

Էստոնացի եվրախորհրդարանական Յակ Մեդիսոնը ԱՄՆ նախկին նախագահ Դոնալդ Թրամփին առաջադրել է Խաղաղության Նոբելյան մրցանակի. հայտնում է ՌԻԱ «Նովոստի»-ն:

Էստոնիայի Պահպանողական ժողովրդական կուսակցությունը ներկայացնող քաղաքական գործիչը բացատրել է, որ Թրամփին առաջադրել է այն բանի համար, որ վերջին 30 տարվա ընթացքում նա ԱՄՆ առաջին նախագահն է, որի ծառայության ընթացքում նրա գլխավորած երկիրը պատերազմներ չի սկսել:

«Բացի այդ՝ նրա ղեկավարությամբ Մերձավոր Արևելքում կնքվեցին մի շարք խաղաղության պայմանագրեր, որոնք օգնեցին տարածաշրջանում կայունություն և խաղաղություն ապահովել», - գրել է Մեդիսոնը Facebook-ում:

Նա նշել է, որ ինքը միակը չէ, ով առաջադրում է Թրամփին Նոբելյան մրցանակի. «Բայց, ինչպես գիտենք, որքան շատ դիմորդներ, այնքան մեծ են հաջողության հնարավորությունները»:

Նոբելյան մրցանակի են առաջադրվել նաև ռուս ընդդիմադիր Ալեքսեյ Նավալնին, շվեդ բնապահպան–ակտիվիստ Գրետա Թունբերգը, ՆԱՏՕ–ն, բելառուս ցուցարարները, Առողջապահության համաշխարհային կազմակերպությունը։