Քննությունից ընդամենը 10 րոպե առաջ դատարան է մուտք արվել Վարդան Այվազյանին կալանավորելու միջնորդությունը. փաստաբան

ԱԱԾ քննիչը ձերբակալման  բողոքի քննությունից ընդամենը 10 րոպե առաջ դատարան էր մուտքագրել Վարդան Այվազյանի նկատմամբ կալանավորումը  որպես խափանման միջոց կիրառելու մասին միջնորդությունը: Այս մասին լրագրողներին հայտնեց  բնապահպանության նախկին նախարար Վարդան Այվազյանի փաստաբան Միհրան Պողոսյանը:

Նա նշեց, որ այդ մասին չեն տեղեկացվել ոչ ինքը, ոչ իր պաշտպանյալը, ինչը օրենքի խախտում է:

Փաստաբանը ասաց, որ ԱԱԾ-ն Վարդան Այվազյանին մեղադրում է  նոյեմբերի 9-ի լույս 10-ի գիշերը տեղի ունեցած բողոքի ցույցերը կազմակերպելու մեջ, որն աբսուրդ է:

«Դա իրավական աբսուրդ չի, դա տրամաբանական աբսուրդի շրջանակից է եւ ես համոզված եմ, որ այս պատվերներ կատարողները, ովքեր որ նման տիպի մեղադրանքներ են առաջադրում, շատ մոտ ապագայում պատասխանատվության են ենթարկվելու, որովհետեւ նրանք իրավունքը վեր են ածել ծաղրի: Էս գործը իրավակիան ճակատագիր չի ունենալու, քաղաքական իրադարձություններով է պայմանավորված լինելու»,-ասաց նա:

Ավելի վաղ հայտնել էինք, որ ձերբակալվել է բնապահպանության նախկին նախարար Վարդան Այվազյանը: Մինչ այդ էլ ԱԱԾ-ն խուզարկություն է իրականացրել Վարդան Այվազյանի բնակարանում:

Ըստ փաստաբանի` Վարդան Այվազյանը կասկածվում է նոյեմբերի 9-ից 10-ի գիշերը բողոքի ցույցերը կազմակերպելու մեջ: