Ե\'վ ես, և\' Դուք գիտենք, որ գազի սպասարկման ոլորտում կրիմինալ կա. Արամ Մանուկյանը՝ Վարդան Այվազյանին

Այսօր ԱԺ տնտեսական հարցերի մշտական հանձնաժողովում ՀԱԿ խմբակցության ներկայացրած որոշման նախագիծը վեճի թեմա դարձավ: Նախ նշենք, որ ՀԱԿ խմբակցությունն իր որոշման նախագծով առաջարկում էր ԱԺ տնտեսական հարցերի մշտական հանձնաժողովին դիմել գլխավոր դատախազություն՝ ներկայացնելով գազի հարցերով ժամանակավոր հանձնաժողովի եզրակացությունը՝ որպես հիմք: Արամ Մանուկյանը ներկայացրեց բոլոր հիմնավորումները, որոնք թույլ են տալիս դիմել դատախազություն: Միաժամանակ, նա նշեց, որ ունի նաև այլ աղաղակող փաստեր խախտումների մասին, սակայն դրանք հիմա չի հրապարակի, քանի որ կարծում է, որ դրանք առայժմ կարող են խոչընդոտել գործին: Պատգամավորը վստահ է, գործը պետք է ուղարկելդ ատախազություն, որպեսզի քննարկվի գազի էժանացման հարցը, և որպեսզի չարաշահումներ ու խախտումներ կատարողները պատասխանատվության ենթարկվեն:

Հանձնաժողովի նախագահ ՀՀԿ-ական Վարդան Այվազյանը նախ կարծիք հայտնեց, որ, դատախազության մասին օրենքի համաձայն, դատախազությունն ինքնուրույն կարող է որոշում կայացնել վարույթ սկսելու մասին, քանի որ գազի հարցերով ժամանակավոր հանձնաժողովի եզրակացությունը տեղադրված է պաշտոնական կայքում:

«Սայթում դրած է, ամբողջապես ներկայացված է, ի՞նչ է խանգարում, որ դատախազությանը վարույթ սկսի, պետք է անպայման ԱԺ-ն նրան դիմի՞: Եվ հետո` ինչո՞ւ չեք դիտարկում ձեր ելույթը` որպես հաղորդում հանցագործության մասին, այսինքն` փոխանակ ԱԺ հանձնաժողով դիմելու, դիմեք անմիջապես դատախազությանը: Ես, օրինակ, դեմ եմ, որովհետև անիմաստ գործընթաց է»,- ասաց Վարդան Այվազյանը՝ հավելելով, որ Արամ Մանուկյանի ներկայացրած հիմնավորումներին էլ դեմ է: «Իրավաբանական անձին ասեմ` գնա քո իրավունքները պաշտպանի, որ քո վրա շատ են գազը հաշվարկո՞ւմ: Եվ հետո` մի դեպք կարո՞ղ եք ասել, որ դա համարենք հաղորդում հանցագործության մասին, որ ասենք՝ «Պողոսյան Պողոս» ՍՊԸ-ն դիտավորյալ շատ գազ է բաց թողել, որ ընկնի քիչ վճարողների ցուցակը»,- հարցրեց նա:

Նշենք, որ Արամ Մանուկյանը հայտարարել էր, որ ԱԺ տնտեսական հարցերի հանձնաժողովը նաև ԱԺ կանոնակարգ-օրենք է խախտել: Միջամտեց հանձնաժողովի աշխատակիցներից մեկը, ով փորձեց հիմնավորել, թե ինչու է խնդիր առաջացնել: Վարդան Այվազյանը Արամ Մանուկյանին դիմեց, որ հանձնաժողովի աշխատակիցը երկար տարիների աշխատակից է, իսկ պատգամավորը նրան չի հավատում: Արամ Մանուկյանն էլ առարկեց` ասելով, որ խոսքը օրենքի խախտման մասին է, և կապ չունի, թե ով ում հետ որքան ժամանակ է ծանոթ:

«Ձեզ հետ էլ եմ քսան տարի ԱԺ-ում, բայց Ձեր ասածները բացարձակ հիմք չեն ու չեմ ընդունում բացարձակ»,- ասաց Արամ Մանուկյանը՝ Վարդան Այվազյանին:

Նա հավելեց, որ ոչինչ չի խանգարում, որ ինքը` որպես պատգամավոր, դիմի դատախազություն, սակայն տարբերությունն այն է, որ մեկ պատգամավորի կողմից դատախազություն ուղարկված գործը ուրիշ հնչեղություն ունի, քան ԱԺ հանձնաժողովի կողմից դատախազություն ուղարկված գործը:

«Ի՞նչն է խանգարում, որ ԱԺ-ն քննարկի այս հարցը, սրա օգուտը նա է, որ այս խնդիրներին տեր կանգնելու առաջարկություն ենք անում: Հիմա էլ հայտարարում եմ` էն, ինչ կարդում եմ, դա հաղորդում է հանցագործության մասին, թող դատախազությունը այն ընդունի` որպես հաղորդում հանցագործության մասին: Ես չեմ ասում` մեղադրանք ներկայացրեք գազի տեսուչին կամ ղեկավարներին, ես ասում եմ` նայեք, տեսեք` կրիմինալ կա՞, թե՞ ոչ, և ես և Դուք լավ գիտենք, որ այնտեղ կրիմինալ կա»,- ասաց Արամ Մանուկյանը: