Ռուսաստանում Իրանի դեսպանը նշել է, թե ով է կանգնած Ֆախրիզադեի սպանության հետևում

Ռուսաստանում Իրանի դեսպան Քազեմ Ջալալին հայտարարել է, որ Իսլամական Հանրապետությունը գիտի, թե ով է պատասխանատու միջուկային գիտնական Մոհսեն Ֆախրիզադեի սպանության համար:

«Այն փաստը, որ մեր թշնամիները ահաբեկչություն են իրականացնում Իրանի դեմ, մեծ նորություն չէ: Ավելին՝ մենք գիտենք, թե ով է կանգնած այս ամենի հետևում, ներառյալ՝ որոշ կառավարություններ»,- ասել է Ջալալին «Ռոսիա 24» հեռուստաալիքին տված հարցազրույցում:

Նրա խոսքով՝ Իրանի քննչական մարմիններն այս պահին ունեն «բոլոր ուղղակի և անուղղակի ապացույցները, որոնք ենթադրում են, որ Իսրայելը կանգնած է հարձակման հետևում, ինչպես նախկինում»:

Իրանը նախկինում Իսրայելին և ԱՄՆ-ին մեղադրում էր իրանցի միջուկային գիտնականներ Մաջիդ Շահրիարիի և Մոստաֆա Ահմադի-Ռոշանի սպանությունները կազմակերպելու մեջ. գիտնականները, համապատասխանաբար 2010 և 2012 թվականներին, Թեհրանում ականապատ մեքենաների պայթյունների զոհ էին դարձել: