Արա Աբրահամյանը` Նիկոլ Փաշինյանին. Բավակա՜ն է խայտառակեք հայ զինվորի անունը, բավակա՜ն է սեփական մեղքը բարդեք ուրիշների վրա

Ռուսաստանի հայերի միության նախագահ Արա Աբրահամյանը դիմել է Նիկոլ Փաշինյանին՝ ասելով.

«Փաշինյանին՝ բավական է խայտառակեք հայ ժողովրդին: Բավական է սեփական մեղքը բարդեք մյուսների վրա: Բավական է Ձեր ֆեյսբուքային դեմագոգիայով արժեզրկեք Հայաստանի քաղաքացիներին ու Սփյուռքի հայերին:

Ցավոք, Ձեր կառավարման տարիները ցույց տվեցին Ձեր լիակատար անգործունակությունը և երկիրն արդյունավետորեն կառավարելու անկարողությունը, առավել ևս՝ գերագույն հրամանատար լինելը: Եվ արդյունքում այսօր մենք ունենք այն, ինչ ունենք՝ վաղնջական հայկական հողերի և սրբատեղիների կորուստ:

Պարո՛ն Փաշինյան, Դուք, հավանորեն, չեք հասկացել, թե ինչ փաստաթուղթ եք ստորագրել, փաստաթուղթ, որում  որևէ հիշատակում չկա Արցախի կարգավիճակի և այնտեղ բնակվող հայերի անվտանգության մասին: Նաև չեք հասկանում, թե ուր եք տանում Հայաստանը և մեր ժողովրդին: Ժողովուրդ, որն այսօր համաձայն չէ Ձեզ հետ և հրապարակ է դուրս եկել, բայց Դուք այժմ այնտեղ չեք: Ձեր փոխարեն ուժայիններն են ու ձերբակալություններ:

Ժողովրդին հարկավոր չեն Ձեր հեքիաթները, թե Շուշին հանձնել են, որովհետև Ծառուկյանը կամ ինչ-որ մեկը ինչ-որ բան այնպես չարեց: Գլխավոր հրամանատարը Ծառուկյանը չէ, այլ Դուք: Վարչապետը Ծառուկյանը չէ, այլ Դուք: Եվ այդ պատճառով առաջին հերթին Ձեզնից են հարցնելու:

Կա՛նգ առեք: Դադարեցրե՛ք ձերբակալություններն ու մարդկանց վախեցնելը, ուժային կառույցներին ձեր ժողովրդի վրա ուղարկելը:

Ժողովուրդը Ձեզնից՝ որպես երկրի ղեկավար, այլ բան է սպասում: Որտե՞ղ է տնտեսության զարգացման Ձեր  ծրագիրը: Ինչպե՞ս են ապրելու այն ընտանիքները, որոնց հայրերն ու որդիները հերոսաբար զոհվեցին, իսկ իրենք ապրուստի միջոց չունեն: Ինչպե՞ս և ինչի՞ հաշվին են ապրելու պատերազմից վերադարձած երիտասարդները, որոնք ամբողջ կյանքում հաշմանդամ են մնալու: Որտե՞ղ և ինչպ՞ս են ապրելու Արցախից տարհանված ու փախստական մեր հայրենակիցները: Ինչպե՞ս են մարդիկ պայքարելու կորոնավիրուսի դեմ, երբ 5 մարդուց կազմված ընտանիքը հիվանդացել է, իսկ դեղերի գումար չունի նույնիսկ մեկի համար:

Որտե՞ղ է Ձեր համակարգային ծրագիրը գործարարության համար: Որտե՞ղ է հստակ ծրագիրը Սփյուռքի ներկայացուցիչների համար, որոնք սրտի կանչով ամեն ինչ անում են պատմական Հայրենիքի համար:

Դուք ունե՞ք հասարակության այս հարցերի պատասխանները: Եթե՝ ոչ, ապա մի խայտառակվեք ու բոլոր հայերին էլ մի՛ խայտառակեք Ձեր անմիտ արդարացումներով ու  հայ ժողովրդի ոգու ուժին, պատվին ու անձնվիրությանը անհամապատասխանությամբ»: