Վրաստանում ուժի մեջ են մտնում նոր սահմանափակումները

Վրաստանի խոշոր քաղաքներում նոյեմբերի 9-ից ուժի մեջ են մտել նոր սահմանափակումները՝ կորոնավիրուսի տարածումը կանխելու միջոցառումների շրջանակներում: Այս մասին ասվում է երկրի կառավարության կայքում հրապարակված միջգերատեսչական համակարգող խորհրդի որոշման մեջ:

«Այսուհետ մասնավոր և պետական մանկապարտեզները կդադարեցնեն աշխատանքը Թբիլիսիում, Քութաիսում, Բաթումում, Ռուսթավիում, Զուգդիդում, Գորիում և Փոթիում»,- ասվում է հայտարարության մեջ:

Խորհուրդը որոշել է նաև սահմանափակել այս քաղաքներում քաղաքացիների տեղաշարժը: Նոյեմբերի 9-ից ուժի մեջ է մտնում 22: 00-ից 5:00 հասարակական վայրերում գտնվելու արգելքը: Բացառություն կկատարվի իրենց պարտականությունները կատարող կարևորագույն ծառայությունների աշխատակիցների համար: Թույլատրվում է նաև գիշերն առաքման ծառայությունների և միջազգային բեռնափոխադրումների վարորդների աշխատանքը:

«Բացի այդ՝ այս քաղաքներում հատուկ միջոցներ կձեռնարկվեն քաղաքային տրանսպորտում մարդկանց թիվը կրճատելու ուղղությամբ: Օրվա ընթացքում երթևեկությունը չի սահմանափակվի »,- ասված է խորհրդի հայտարարության մեջ:

Հարկ է նշել, որ Վրաստանում կորոնավիրուսի տարածումը նոյեմբերից կրկին սկսել է աճել: Նոյեմբերի 8-ի դրությամբ հանրապետությունում գրանցվել է վարակի 57753 դեպք. վերջին օրվա ընթացքում գրանցվել է 2901-ը: