ԱՄՆ-ը Կիպրոսից պահանջել է չթույլատրել ռուսական ՌԾ նավատորմի նավերի անցումը

ԱՄՆ-ը դժգոհ է, որ Կիպրոսը որևէ գործողություն չի ձեռնարկում ռուսական ռազմական նավերի մուտքը նավահանգիստներ կանգնեցնելու համար:

«Ես առանձին-առանձին շեշտել եմ, որ Կիպրոսը դեռևս անհրաժեշտ քայլեր չի ձեռնարկել ռուսական նավատորմի նավերին իրենց նավահանգիստներ մուտք գործելու հարցում մերժելու համար: Այս և այլ քայլերն, անկասկած, անհրաժեշտ են։ Մենք ցանկանում ենք, որ Կիպրոսի Հանրապետությունը շարժվի այս ուղղությամբ»,- հայտարարել է ԱՄՆ պետքարտուղարի ռազմաքաղաքական հարցերով խորհրդական Քլարք Քուփերը։

Նրա խոսքով՝ նման քայլը Կիպրոսին թույլ կտա ընդլայնել պաշտպանական ոլորտում ԱՄՆ-ի հետ համագործակցությունը:

Ավելի վաղ ԱՄՆ պետքարտուղար Պոմպեոն մտահոգություն էր հայտնել Սիրիա մեկնող ռուսական նավերի՝ կիպրական նավահանգիստներում խարիսխ գցելու կապակցությամբ: ՌԴ արտաքին գործերի նախարարության խոսնակ Մարիա Զախարովան նշել է, որ ԱՄՆ-ին չեն վերաբերում Ռուսաստանի ու Կիպրոսի հարաբերությունները: