Կորոնավիրուսի պատճառով Եվրոպայում Սուրբ Ծննդյան ավանդական տոնավաճառները չեղյալ են հայտարարվել

Եվրոպական երկրներում կորոնավիրուսի հետ կապված իրավիճակի պատճառով սկսել են աստիճանաբար չեղյալ հայտարարել Սուրբ Ծննդյան ավանդական տոնավաճառները. հաղորդում է «Ինտերֆաքս»-ը:

Մասնավորապես՝  այս տարի չի անցկացվի Ֆրանսիայի ամենահայտնի տոնավաճառներից մեկը Ստրասբուրգում: Անցյալ տարի այն երկու միլիոն այցելու էր ունեցել: Դեկտեմբերին չի կայանա նաեւ տոնավաճառը Բեռլինում, որը ամեն տարի միջինը մոտ մեկ միլիոն մարդ է այցելում:

Շոտլանդիայի կառավարության` առողջապահության հարցերով խորհրդատու Ջեյսոն Լիթչը հորդորել է բոլորին այս տարի պատրաստվել «թվային Սուրբ Ծննդյան տոնի»: «Սուրբ Ծնունդը նույնը չի լինելու: Մենք չենք հավաքվելու մեծ խմբերով, երբ հավաքվում է մի քանի ընտանիք: Այս տարվա համար դա ֆանտաստիկա է: Բայց ես հույս ունեմ, որ եթե մենք կարողանանք նվազեցնել ցուցանիշները, ապա գուցե կարողանանք քիչ թե շատ նորմալ Սուրբ Ծնունդ ունենալ»,- ասել է Լիթչը:

Ավելի վաղ հաղորդվել էր, որ Իռլանդիայի իշխանություններն են խիստ սահմանափակումներ մտցրել վիրուսի դեմ պայքարում, որպեսզի փորձեն կարգավորել իրավիճակն առաջիկա շաբաթների ընթացքում: Դա թույլ կտար խուսափել լուրջ սահմանափակումներից Ծննդյան տոներին:

Վերջին շաբաթներին եվրոպական երկրները հաղորդում են կորոնավիրուսի դեպքերի թվի աճի մասին, ընդ որում՝ շատ երկրներում առողջապահական ծառայություններն ավելացրել են COVID-19-ի ախտորոշման թեստավորման քանակը: