Ֆրանսիայում սպառնալիքների պատճառով երկու մզկիթի հսկողություն կհաստատեն

Ֆրանսիայի ՆԳ նախարար Ժերալդ Դարմանենը դեպարտամենտների պրեֆեկտներին հանձնարարել է ապահովել երկրի հարավում Բեզյե եւ Բորդո քաղաքների մզկիթների հսկողությունը, որոնց ավելի վաղ սպառնալիքներ էին ուղարկվել, փոխանցում է «ՌԻԱ Նովոստի»-ն։

«Սպառնալիքները կամ բռնության ակտերը ուղղված են Բեզյե եւ Բորդո քաղաքների մզկիթներին։ Ես համապատասխան դեպարտամենտների պրեֆեկտներին խնդրել եմ նրանց պաշտպանություն տրամադրել։ Հանրապետության տարածքում համանման գործողություններն անթույլատրելի են»,- Twitter-ում նշել է Դարմանենը։

Հոկտեմբերի 16-ի երեկոյան չարագործը Փարիզից ոչ հեռու Քոնֆլան Սենթ Օնորին կոմունայում ուսումնական հաստատություններից մեկի մոտ գլխատել էր պատմության ուսուցչին։ Նրան հարեւան Էրանյի կոմունայում գնդակահարել էին ոստիկանության աշխատակիցները։ Գործի քննությունը կատարում է դատախազության հակաահաբեկչական բաժինը։

Լրատվամիջոցների տեղեկություններով՝ սպանությունը կարող էր կապված լինել դպրոցում տեղի ունեցած միջադեպի հետ, որտեղ ուսուցիչն աշխատում էր։ Հաղորդվում է, որ հոկտեմբերի 5-ին նա դաս էր անցկացրել, որի ժամանակ քննարկվել է խոսքի ազատությունը։ Ուսուցիչը ցույց է տվել Մուհամմեդ մարգարեի ծաղրանկարները։ Ֆրանսիայի նախագահ Էմանուել Մակրոնը տեղի ունեցածն անվանել է ահաբեկչական ակտ։