Արցախում Ադրբեջանի ԶՈՒ հրետակոծությունից տուժած` Le Monde-ի թղթակցի վիճակը ծանր է. նրան վիրահատում են

Արցախում Ադրբեջանի զինված ուժերի հրետակոծության հետևանքով տուժած` ֆրանսիական Le Monde պարբերականի լրագրողներից մեկի վիճակը ծանր է, նրան վիրահատում են: Այս մասին հայտնել է Արցախի նախագահի մամուլի խոսնակ Վահրամ Պողոսյանը:

«Le Monde-ի թղթակցի վիճակը ծանր է, նրան վիրահատում են Ստեփանակերտի բժշկական կենտրոնում: Լրագրողներն Ադրբեջանի ԶՈՒ հրետակոծության արդյունքում վիրավորում էին ստացել Մարտունու քաղաքապետարանի շենքում»,- ասել է նա:

Արցախի Մարտունի քաղաքում ադրբեջանական զինուժի կողմից թիրախավորվել է լրագրողների խումբ: Հրետակոծության հետևանքով վիրավորում են ստացել ֆրանսիական Le Monde պարբերականի երկու լրագրողները, նախնական տվյալներով` Ֆրանսիայի քաղաքացի, Հայաստանի «Արմենիա» հեռուստաընկերության օպերատորը Արամ Գրիգորյանը և 24news-ի լրագրող Սևակ Վարդումյանը: Ռուսական «Дождь» հեռուստաընկերության գլխավոր խմբագրի տեղակալ Դմիտրի Ելովսկին այժմ գտնվում է ռմբապաստարանում: Թիրախավորվել էր նաև France-Presse գործակալության լրագրողների մեքենան: