Պուտինն ինքը կորոշի՝ պատվաստվե՞լ կորոնավիրուսի դեմ, թե՞ ոչ․ Պեսկով

Ռուսաստանի Դաշնության նախագահ Վլադիմիր Պուտինն ինքը որոշում կկայացնի կորոնավիրուսի դեմ պատվաստվելու վերաբերյալ: Այս մասին հայտնում է gazeta.ru-ն՝ վկայակոչելով պետության ղեկավարի մամլո խոսնակ Դմիտրի Պեսկովի խոսքերը:

Նա ասել է. «Ինչ վերաբերում է նախագահի պատվաստմանը, ապա երբ և եթե նա դա անհրաժեշտ համարի, այդ մասին կտեղեկացնի»:

Հիշեցնենք՝ Ռուսաստանի առողջապահության նախարարությունն ավելի վաղ գրանցել էր կորոնավիրուսի դեմ աշխարհում առաջին պատվաստանյութը, որը մշակվել է Գամալեյայի անվան համաճարակաբանության եւ մանրէաբանության ազգային հետազոտական կենտրոնում (ՀՄԱՀԿ)՝ Ռուսաստանի ուղղակի ներդրումների հիմնադրամի (ՌՈւՆՀ) հետ համատեղ: Այն ստացել է «Սպուտնիկ V» անվանումը: Դա լուծույթ է՝ միջմկանային ներարկման համար:

Պլանավորում են պատվաստել երկու փուլով՝ երեք շաբաթ ընդմիջումով: Այսպիսի սխեման թույլ Է տալիս իմունիտետ ձեւավորել մինչեւ երկու տարի ժամկետով: ՌՈւՆՀ-ի ղեկավար Կիրիլ Դմիտրիեւը հայտնել է, որ հիմնադրամն ավելի քան 20 երկրից 1 միլիարդ չափաբաժին գնելու հայտ է ստացել: Նա նշել է, որ Ռուսաստանը պատվաստանյութի արտադրության շուրջ պայմանավորվել է հինգ երկրների հետ, առկա հզորությունները թույլ են տալիս մեկ տարում արտադրել մինչեւ 500 միլիոն չափաբաժին։