ԲՀԿ-ն աշնանը կորոշի, թե ինչպես է մասնակցելու ընտրություններին

ԲՀԿ ղեկավար Նաիրա Զոհրաբյանը պատգամավոր Վարդան Օսկանյանի` կուսակցություն ստեղծելու մտադրության մասին իմացել է երեկվա նրա հայտարարությունից մեկ շաբաթ առաջ, երբ հանդիպում էր ունեցել Օսկանյանի հետ:

«Երեկվա հայտարարությունից մոտավորապես մեկ շաբաթ առաջ մենք հանդիպել ենք Օսկանյանի հետ, և նա ասել է, որ առաջիկայում կհայտարարի նոր քաղաքական ուժ ստեղծելու մասին: Նա լուրջ քաղաքական գործիչ է, լուրջ ավանդ ունեցող գործիչ է», – այսօր խորհրդարանում լրագրողներին ասաց նա:

Անդրադառնալով Էլինար Վարդանյանի, Ստեփան Մարգարյանի, Վահե Հովհաննիսյանի` նոր կուսակցությանն անդամագրվելու հնարավորությանը, Զոհրաբյանը նշեց. «Վահե Հովհաննիսյանի մասով կարող եմ ասել, որ նա ԲՀԿ-ի անդամ չի եղել: Մարգարյանը «Հզոր Հայրենիք» կուսակցության փոխնախագահն է: Իսկ ինչ վերաբերում է Վարդանյանին, ես չեմ բացառում, որ նա և Մարգարյանը լինեն այդ կուսակցության անդամ»:

Ի դեպ, արձագանքելով հարցին, թե արդյո՞ք ԲՀԿ-ն առաջիկա խորհրդարանում կհաղթահարի 5 տոկոսանոց արգելքի շեմը, նա ընդգծեց. «5 տոկոսի շեմի մասին խոսելը համարում եմ ծիծաղելի: Վստահեցնում եմ, որ ԲՀԿ-ն շատ լուրջ ներկայություն է ունենալու 2017 խորհրդարանում»:

Զոհրաբյանի խոսքով`աշնանը՝ սեպտեմբեր ամսին, իրենք կհրավիրեն կուսակցության համագումար, որտեղ, բնականաբար, կհաստատվի նաև կուսակցության համամասնական ցուցակը: «Կարծում եմ՝ սեպտեմբեր-հոկտեմբեր ամիսներին շատ ավելի հստակ կլինի՝ ԲՀԿ-ն միայնա՞կ կգնա ընտրություններին, թե՞ այս կամ այն ընդդիմադիր կուսակցության հետ դաշինքով: Այս պահին հակվածությունը միայնակ մասնակցելն է: Բայց կրկնում եմ՝ դեռ վաղ է նման վերջնական տեսակետ հնչեցնելու համար»,- ասաց Զոհրաբյանը և հավելեց, որ քաղաքականության մեջ որևէ բան չի կարելի բացառել: