Խոշտանգված Գ. Վիրաբյանի գործն ուղարկե՞լ նոր քննության, թե՞ ոչ. կորոշի առաջին ատյանի դատարանը

Ընդդիմադիր քաղաքական հայացքների համար հետապնդված և ոստիկանների կողմից խոշտանգված, ներկայումս Բելգիայում բնակվող Գրիշա Վիրաբյանի գործն այսօր քննվեց Էրեբունի և Նուբարաշեն  վարչական շրջանների ընդհանուր իրավասության դատարանում` Վլադիմիր Գրիգորյանի նախագահությամբ:

2012 թվականի հոկտեմբերի 2-ին Եվրադատարանի կողմից ընդունված վճռով հաստատվել է Գ. Վիրաբյանի հանդեպ խոշտանգումներ կատարելու, ինչպեսև նրա անմեղության կանխավարկածի և արդար դատաքննության իրավունքների խախտումը և որոշվել` գործն ուղարկել վերաքննության:  ՀՀ-ին պարտավորեցրել են` Գ. Վիրաբյանին 31 հազար եվրոյի փոխահատուցում տալ դատական ծախսերի և խախտված իրավունքների համար:

2004 թվականին Գ. Վիրաբյանը` որպես ՀԺԿ անդամ և Ստեփան Դեմիրճյանի վստահված անձ, մասնակցել է ցույցերի, ինչի պատճառով նրան ապրիլի 23-ին ոստիկանության Արտաշատի բաժին են կանչել: Այստեղ Վիրաբյանին խոշտանգել են, փորձել ինչ-որ ցուցմունքներ կորզել, ինչի հետևանքով նրան առողջական լուրջ վնաս է հասցվել, հեռացվել է օրգաններից մեկը:

Վիրաբյանը մի շարք հրապարակումներում պնդել է, որ իրեն խոշտանգող ոստիկաններից է եղել  Երևանի ներկայիս ոստիկանապետ Աշոտ Կարապետյանը: Վիրաբյանը դատախազությունից պահանջել էր քրեական գործ հարուցել իրեն  խոշտանգելու համար, սակայն պահանջը գրավոր մերժվել է: Մերժումը հայաստանյան բոլոր ատյաններում բողոքարկվելուց հետո նա դիմել էր Եվրադատարան:

Վիրաբյանի շահերը ներկայացնող իրավապաշտպան Արտակ Զեյնալյանն այսօր ներկայացրեց բողոքի պահանջը, այն է` դեռևս 2005 թվականին դատախազի կողմից Վիրաբյանին խոշտանգելու մասով գործը կարճելու որոշումն անհիմն ճանաչել և ուղարկել պատշաճ նախաքննություն կատարելու:

Ա. Զեյնալյանի խոսքով` Եվրադատարանի կողմից դիմումի բավարարումը չի ենթադրում, որ գործի քննությունն ավարտվել է, և Հայաստանի կողմից փոխահատուցման վճարումը չի նշանակում դատական ակտի կատարում: Եթե միայն փոխահատուցում տալով լիներ` ապա երկրները կխախտեին մարդկանց իրավունքները և միայն փոխհատուցում կտային:

«Եվրադատարանի որոշմամբ հաստատվել է, որ արդար քննություն չի կատարվել: Եվ Հայաստանը պարտավոր է կատարել այդ քննությունը: Եթե դա չկատարվի, ապա Գ. Վիրաբյանի իրավունքների խախտումը կշարունակվի»,- ասաց Ա. Զեյնալյանը:

Դատախազ Հայկ Մովսիսյանը բողոքը բավարարելու դեմ առարկություններ չուներ: Նա նշեց, որ համամիտ է Վիրաբյանի պաշտպանների հետ, որ գործը պետք է ուղարկել նոր քննության` համաձայն Եվրադատարանի որոշման, հատկապես, որ Հայաստանը միացել է Եվրակոնվենցիային, և Եվրադատարանի որոշումների կատարումը Հայաստանի կողմից պարտադիր է:

Դատարանը կողմերի դիրքորոշումները լսելուց հետո գործի քննությունը համարեց ավարտված և անցավ խորհրդակցական սենյակ: Դատական ակտի հրապարակումը կլինի մայիսի 22-ին: