Արթուր Մկրտչյանն առաջինը պետք է, որ արժանանար Արցախի հերոսի կոչմանը․ Դավիթ Իշխանյան

ՀՅԴ Արցախի Կենտրոնական կոմիտեի ներկայացուցիչ Դավիթ Իշխանյանը ֆեյբուքյան իր էջում անդրադարձել է ԱՀ նախագահի կողմից Արթուր Մկրտչյանին հետմահու «Արցախի հերոս» կոչում շնորհելու հարցը համապատասխան հանձնաժողովի քննարկմանը ներկայացնելուն:

Ստորև ներկայացնում ենք Դավիթ Իշխանյանի ֆեյսբուքյան գրառումը.

«Ողջունում եմ ԱՀ նախագահ Արայիկ Հարությունյանի` ԼՂՀ Գերագույն խորհրդի առաջին նախագահ Արթուր Մկրտչյանին հետմահու Արցախի Հանրապետության բարձրագույն պետական կոչում (Արցախի հերոս) շնորհելու հարցը համապատասխան հանձնաժողովի քննարկմանը ներկայացնելու նախաձեռնությունը: Իմ խորին համոզմամբ, Արթուր Մկրտչյանն առաջինը պետք է, որ արժանանար Արցախի հերոսի կոչմանը: Թեկուզ ուշացումով, ԱՀ նախագահի քայլը գնահատելի է: Ավետիս Ահարոնյանի խոսքերն ուղղված Զորավար Անդրանիկին եղել են ինձ համար ուղեցույց՝ Հերոսի իսկական կերպարը գնահատելու համար: Այդ խոսքերը հնչեցրել եմ իմ ելույթում՝ Արթուր Մկրտչյանի 60-ամյակին նվիրված միջոցառմանը. «Միշտ էլ ցավ ունեցա Անդրանիկի ուսադիրների համար: Ազգային հերոսները պաշտոնական փայլ ու պատվից միշտ պետք է ազատ մնան: Հարգանքն ու պաշտամունքը, որ ժողովուրդն է փռում իր ընտրյալների ոտքերի առջև, մշտական և անուշաբույր խնկարկություն է: Ոչ մի շքանշան, ոչ մի պատվո աստիճան չի կարող այն փոխարինել»»: