Ռուսաստանի հետ պաշտպանական համագործակցությունը զգալիորեն աճում է. Իրանի ՊՆ

Օգոստոսի 22-ին Իրանի պաշտպանության նախարար, բրիգադային գեներալ Ամիր Խաթամին հայտարարել է, որ Ռուսաստանի հետ պաշտպանական և ռազմական համագործակցությունը դրական է և նկատելիորեն աճում է: Այս մասին հայտնում է իրանական IRNA գործակալությունը:

Խաթամին այսպիսի հայտարարություններ է արել ռազմական և պաշտպանական պատվիրակության՝ Մոսկվա ժամանելուն պես: «Մենք ականատես ենք եղել փոխադարձ համագործակցության զգալի վերելքների», - ասել է Իրանի պաշտպանության նախարարը: «Դրա օրինակ է համատեղ պատերազմական խաղը, որն անցկացվել է Հյուսիսային Հնդկական օվկիանոսում և Օմանի ծոցում Իրանի, Ռուսաստանի և Չինաստանի հետ», - ասաց նա:

«Իհարկե, այս տարի կորոնավիրուսը որոշ չափով ազդել է Իրանի և Ռուսաստանի համագործակցության վրա, բայց իմ ընդհանուր գնահատականն այն է, որ երկու երկրների միջև համագործակցությունը բավականին դրական և հեռանկարային է», - ասել է Խաթամին:

Բրիգադային գեներալ Խաթամին նաև նշել է, որ Մոսկվա կատարած այցի ընթացքում նա կմասնակցի ռազմական սեմինարին և ցուցահանդեսին`ծանոթանալու վերջին ռազմական ձեռքբերումներին և քննարկելու երկկողմ և տարածաշրջանային հարցեր: