Եգիպտոսի խորհրդարանը վավերացրել է Հունաստանի հետ համաձայնագիրը

Եգիպտոսի խորհրդարանը վավերացրել է Հունաստանի հետ կնքված համաձայնագիրը Արևելյան Միջերկրականում բացառիկ տնտեսական գոտիների սահմանազատման վերաբերյալ։

Եգիպտական Էլ-Բելեդ հեռուստաընկերության համաձայն՝ խորհրդարանի Սահմանադրական և օրենսդրական հանձնաժողովը վավերացրել է համաձայնագիրը։

Նշենք, որ Հունաստանը օգոստոսի 7-ին կնքված համաձայնագրի նման փաստաթուղթ էր ստորագրել նաև Իտալիայի հետ՝ հունիսի 9-ին։

Անկարան հայտարարում է, որ այդ համաձայնագրերը առ ոչինչ են և օրենքի ուժ չունեն։

Թուրքիան շարունակում է իր ապօրինի գործողությունները Հունաստանի և Կիպրոսի ջրային տարածքներում։ Եգիպտոսը նշում է, որ Թուրքիայի գործողությունները վտանգում են Եգիպտոսի իրավունքներն այդ տարածքներում։