Թուրքիայի խորհրդարանը վավերացրել է Փարիզի համաձայնագիրը

Թուրքիայի Ազգային մեծ ժողովը չորեքշաբթի ընդունել է Փարիզի կլիմայական համաձայնագրի վավերացման մասին օրինագիծը՝ համաձայն խորհրդարանի քվեարկության արդյունքների: Համապատասխան օրինագիծը ընդունվել է միաձայն:

Փարիզի կլիմայի համաձայնագիրը՝ կլիմայի վերաբերյալ առաջին գլոբալ համաձայնագիրը, որը ստորագրվել է ավելի քան 190 երկրների կողմից 2015 թվականի դեկտեմբերին, սահմանում է գլոբալ տաքացման զսպման գործողությունների ծրագիր: Համաձայնագիրը չի ենթադրում հանածո վառելիքից ամբողջական փուլային հրաժարում: Այնուամենայնիվ, բոլոր կողմերը պետք է միջոցներ ձեռնարկեն՝ արտանետումները նվազեցնելու, տեխնոլոգիապես վերազինվելու և կլիմայի փոփոխություններին հարմարվելու համար: Բացի դրանից՝ վերականգնվող էներգիայի աղբյուրների մասնաբաժինը պետք է ավելի ու ավելի շատ լինի էներգիայի մատակարարումների մեջ: Դոնալդ Թրամփի օրոք ԱՄՆ-ը դուրս եկավ համաձայնագրից, սակայն ԱՄՆ նոր նախագահ Ջո Բայդենը իր նախագահության առաջին իսկ օրը հրամանագիր ստորագրեց  դրան վերադառնալու մասին: