Սերժ Թանկյանը կոչ է անում միանալ DEFENDARMENIA.COM միջնորդագրին

System of a Down հայտնի խմբի մենակատար Սերժ Թանկյանը Instagram-յան իր միկրոբլոգում կոչ է արել միանալ DEFENDARMENIA.COM միջնորդագրին։ 

Նա, մասնավորապես, նշել է. «Թույլ մի՛ տուր Ադրբեջանին գողանալ քո գումարը․ այցելի՛ր DEFENDARMENIA.COM՝ միջնորդագիրը ստորագրելու համար»։ 

Թանկյանը մանրամասնել է՝ 1992 թվականից ի վեր ամերիկացի հարկատուների գումարներից ավելի քան 1․5 մլրդ դոլար է ծախսվել ավտոկրատ կառավարությանը ֆինանսավորելու համար։ Բացի այդ, ԱՄՆ ՊՆ-ը 2018 և 2019 թվականներին Ադրբեջանին 101 միլիոն դոլարի ռազմական օժանդակություն է տրամադրել, որը յուրացվել է և օգտագործվել ոչ նպատակային՝ տարածաշրջանային պատերազմեր հրահրելու, ներառյալ՝ Հայաստան ներխուժելու փորձերի վրա։

Նշենք՝ հիշյալ միջնորդագրով կոչ է արվում դադարեցնել Պաշտպանության նախարարության և Միջազգային զարգացման գործակալության կողմից Ադրբեջանին ֆինանսավորումը։