Քանյե Ուեսթն առաջին միջոցառումը կանցկացնի նախընտրական քարոզարշավի շրջանակում

Ամերիկահայ հեռուստաաստղ Քիմ Քարդաշյանի ամուսինը՝ սևամորթ ռեփեր Քանյե Ուեսթը, մտադրություն ունի իր նախընտրական առաջին միջոցառումն անցկացնել հուլիսի 19-ին, Հարավային Կարոլինայում. այս մասին հայտնում է Politico-ն:

Նշվում է՝ ընտրողների հետ Ուեսթի հանդիպումը կկայանա Նորթ-Չարլսթոն քաղաքի Exquis Event Center-ում: Հանդիպմանը կարող են մասնակցել միայն նախապես գրանցված հյուրերը, որոնց տեղեկացվում է բժշկական դիմակ կրելու և սոցիալական հեռավորությունը պահպանելու անհրաժեշտության մասին: Միևնույն ժամանակ, միջոցառման հյուրերը պետք է թուղթ ստորագրեն, որը կազմակերպիչներին կազատի պատասխանատվությունից՝ մասնակիցների կորոնավիրուսով վարակվելու դեպքում:

Այս առնչությամբ Ուեսթը իր թվիթերյան միկրոբլոգում դիմել է Հարավային Կարոլինայի իր հետևորդներին ստորագրություն թողնելու խնդրանքով՝ նախագահական ընտրությունների քվեաթերթիկում ընդգրկվելու համար: 

Նշենք՝ հուլիսի 15-ին ԱՄՆ-ի Դաշնային ընտրական հանձնաժողովը քննության է առել Ուեսթի որպես նախագահի թեկնածու գրանցվելու դիմումը: Ռեփերը առաջադրվում է իր սեփական կուսակցությունից՝ The Birthday Party-ից: